Ephesians 3
Shekwoyi Iko N Yi Mi
1Omi Bulus Yesu Kristi fyenu, mi dyna n kurkuku ntu n fye ɓo nu, ntuge mi zhin waʼazi ge efye abyedo fye zhin Shekwoyi nya nu ce. 2– 3Lale fye kpelo ge, Shekwoyi la tnu-tnu ye gami, ma wu fye Shekwoyi alheri n fye aba, shi mi ɓei gna fye n mi wasika ho, Shekwoyi nu ɓei wumi shiri ye asiri nge abyedo filo ce n wo alheri. 4Mi da deye ntuge fya kpe ge mikpe aɓei yelo vinya. 5Nsapai Shekwoyi to ɓei wu wo shiri ye nwo aza aban, ama nsaiye wola kwo guya wu owo atnu-tnuyi n anabi yi dna n Zafun Gyi-gyi-yi.6Asiriyi honyi, nge abyedo ɓa bwa oɓa robo dna n wo nyabwa ngyisun n Shekwoyi aɓiyi, ala ɓa gni, yi ɓa ze owo ikklisiya. Shekwoyi alkawali adnagmayi vinya zhin ɓa nya nu ce, dna n Kristi, sanu nɓa gwo Nabari manayi Kristi nya, n ɓei nwa zhin ga ɓa nyi. 7Shekwoyi la esa manayi gami, ma gna aza owo shiri ye ɓo, woi la ikwo gami n kpezhin yi ma zhin kwo n bmiya.
8Fye dnawye fa gye kwo shi ko nyi mito ɓei zhin ɓeho nu a gami kwon, emi nu nmi zhin. Yesu viyi gbeloyi n wolo n na anyi, dudu lonu a ɓei kni mi nu n na agmada manayi ye ɓo, ma gna abyedo Nabari Dagayi nyabwa n kwota shan zon, n kwo lo ntu n ɓa ɓo dna n Kristi nyi. 9Ma wu aza vinya nge Shekwoyi nu zhin abyedo gniyi ce, shi oza n wa zhin anya vinya nyi, wa zhin shiri tunyi n sapa.
10Ntu kniɓeyi a? Ntu ge wa wu abegyi yi n anyi bmana shi wo cecei, esa nu n agye owo aɓi a Yahudiyi n abyedo yi n ɓedo fi n wo ikklisiya. 11N zokwo n wa zhinkwo shiri dna n Yesu Kristi eyi Dagayi nyi.
12Nsaiye yi ɓa mi ya ɓe Shekwoyi aba cewo n tna edna, ya ɓe ntna bugba ashan-shan, sanu n ya ɓe n gaiciya ga yi dna Kristi.
13Ntucenu fye to bma bugba ya ntu nyaɓo n ɓa zhin mi n ya nyin, Mi sin wahala ntu fye ɓonu, kwo bmiya lo fya gma fya bwa bugba kala ntu ce. 14– 15Sanu mapa owo ɓeyekpe ɓo nwo shiri mwa-mwa yi, ma ce akwo-kwo ma zhin aduwa ga Dada Ikklisiya nya. 16Ma zhin aduwa ge dna n wo nyabwa dnagmayi n kwo ta shan zo nyin wo ɓa ga fye awyega n fye bugbami owo Zafun Gyi-gyi-yi nya. 17Mi zhin aduwa n na bai Kristi wa dna nfye a bugba mi n mwa cici, wa sase dna n fye mi, shi fye gawo gaiciya. Fa fya mi zhi dna n Shekwoyi ye-ye ɓo wo-wo nya. 18– 19Fya mi fyabwa awyega shi Shekwoyi aɓi kunce ɓa bwa, ngye shi wo ye-ye nyi nkwo kpayi, nkwo pata yi, n kwo lo-loyi, n kwo lawu yi, fya wo ye-ye shan n fyehin, kwo da yake kwo mwa lo, nfye ta gye okwo abwa yazhi ban, kwo fya kpe kwo ye vinyan, nna bai n fye ɓa ze anu-nuyi n Shekwoyi n wohin tukwo.
20Nsaiye, mwa-mwa n Shekwoyi aba, n wa lo tnu-tnu n wo ikwo dnagmayi n yimi, wo ɓami wa zhin enya ndu ngye shi yi ɓa mi ya nya, kwo ya nuna n duyi aduwa dnagmayi zhin, eyi aɓo pwawo nubo zhin, n ya awyetu yi. 21Fye gawo mwa-mwa nyalo-nyalo ntu n wo shiri gni-gni nya ɓo, ntu ikklisiya ɓo dna n Yesu Kristi.
Copyright information for
GbrGAW